Isperas

Poeta banduleri
che jana presumida
furo a s’accua isteddos a sa luna,
caddos de bisos setzo,
isteddados, chena briglias
e los truvo afferradu
a giuas de chimeras,
chesuras de billèllera brinchende,
in sas tancas de chelu
fioridas de violeras.

Onzi tantu, a modu meu,
turmentadu prego a Deus
e a mesu costa mi frimmo
a m’imbreagar’‘e isperas,
dei cussas isperas vanas
chi sulan, si si nd’ammentan,
in sa braja ‘e su coro
interrada in chijina ‘e isméntigu
morigada cun ispidu
chi luádu s’anima forrojat
chei s’aghedu ferida ancora aberta.

Nues anfaneras de neula
mi trobojan su coro
e úrulos de mudore
assurdan sa notte
chi b’est intro.

Ah ispera de isperas
immandrada in su nudda
ingullida in s’olvidu ‘e una vida
corona de dies chena cabu!

ANTONEDDU BAZZU

=================

Speranze
Poeta ramingo / come altezzosa maga / di nascosto rubo stelle alla luna, / cavalli di sogni cavalco, /
fronte stellata, senza briglie / e li sprono avvinghiato / a criniere d’illusioni / saltando siepi di follia /
nelle distese del cielo / fiorite di sciocchezze. / Ogni tanto, a modo mio, / tormentato prego Dio /
e a mezza strada mi fermo / ad ubriacarmi di speranze / di quelle speranze vane /
che attizzano, se si ricordano, / la brace del cuore / coperta dalla cenere dell’oblio /
rivoltata con spiedo / che avvelenato fruga l’anima / come l’aceto ferita ancora aperta. /
Nuvole ammaliatrici di nebbia / mi confondono il cuore / e urla di silenzio / assordano la notte / che vi alberga. /
Ah speranza di speranze / rinchiuse nel nulla / inghiottite dall’oblio di una vita / rosario di giorni senza senso!