Isperas
Salvatore Murgia

Puddedros rudes in sa tanca annijan
ca sedda e briglia pis no lis chinghen:
boes isgiuntos su pilu s'allijan,
loros istranzos pius no nde linghen.

Bamas paschinde in trivuzu s'ispjan,
montes ispozos de 'irde si tinghen:
bobbois in s'arzola s'infrommijan
e-i su ranu a sas tanas ispinghen.

Rios de lele sas abes produen,
in sos frailes sos marteddos tinnin,
in totue de festa b'at abbajos.

Sos òmines s'abbaidan in ojos
e pibiristas tra issos non chinnin:
semenan paghe, sas gherras distruen.

(Macomer)