Isperantzia.

In sas notes serenas de istiu,
cando sa frina che trazat atesu,
nues chi sa calura b’at istesu
a costoìre s’universu abrìu,
acollu maestosu immensu riu,
ue su mundu si ismarridi in mesu.

Luego andat sa mente a si chircare,
lacanas chi resessat a medire,
proende s’infinidu a reduire,
in cunzados chi potat manizare,
cherinde che padrona iscurrizare,
in passadu presente e avenire.

Ma, m’abizo ch’est pagu su connotu,
e mi perdo in caminos chentza fine,
ca no b’agato giàgas o cunfine,
nudda cumprendo e totu m’est ignotu,
de vida e ne de morte tenzo annotu,
pèrdidu e solu in mares de pruìne.

De cantu bramo, penso o puru intendo,
a nudda poto narrer immortale,
totu suta una lege naturale,
chi si paschet de cantu apo e difendo,
totu mi paret vanu e no cumprendo,
cal’est sa fortza amiga coriale,

chi in su coro intristidu at semenadu,
sos milli sentimentos costoidos,
chena ischire comente sun bennidos,
e s’anima puite an disveladu,
de tristas penas nende o malu fadu,
e lassende sos sensos isturdidos.

Fortzis in suspu antigu est avisende:
de s’eternu no manchet sa cussentzia,
chi debadas no currat s’esistenzia,
cando a su nudda parimos andende,
cun umana isperantzia chirchende
ranigheddos de eterna connoschénzia.

Franco Piga (Romana ‘SS’)
Bennalzu 2007