In Morte Babbu Meu
di Antioco Casula

Ispinta dae su bentu de sa morte
rutta est l'alvure manna chi tenia,
s'alvure antica de sa domo mia
chi daiat car'umbra in custa corte.
Ancora fit deretta, bella e forte
e de sabios fruttos providia.

Fist tue cussa pianta, babbu caru,
de Desulo sa fama ei s'onore,
bene pesada cun d'onzi isplendore
in custos altos cuccuros a ciaru.
Mastru de onzi onestu e santu imparu,
esempiu de onestade e cortesia.

"O fizu meu, ista attentu e sanu
e ube podes chin su mundu affronta:
mi chi commo sa zente no est tonta
e t'istrazzat su tuo dae manu.
Non brighes chin nessunu cristianu
ca su brigare no est balentia.

Ma si t'esset forzosu a facher briga,
briga bene, chi s'atteru non ridat,
e si un'attera borta in cara t'idat
tremat issu e non tue, che ispiga.
Apprezza de onzunu sa fatiga,
nè tropp'ispendas nè appas suria.