In disizos de t’ ‘ider
di Padre Luca Cubeddu

1.
In disizos de t’ ‘ider, riccu fiore,
Piango a disconsolu s'ausenzia,
Sos suspiros ti movant a clemenzia
Ca si no in delirios hap'a dare.
Permitti, hermosa Flora, a ti mirare
Si m'has istimassione, bell'aurora,
Permitti a ti mirare, hermosa Flora,
S'est veru chi pro me brujas d'amore.

2.
In disizos de t’ ‘ider, notte e die,
Mi si finit su coro in sas intragnas,
S'est ch'has ardores de amore a mie
Fiore delicadu in sa campagna.
In delirios do, pensende a tie
Si tenes pro amante sas asagnas;
Donosa, faghe medios e magnas
Cum chi' ti adorat a t'ider a pare.

3.
Delliriende so, pro sa tua bellesa
Nde so a regirare, e no lu crese
Pro chi ses bella de naturalesa,
Che Diana Effesina bella sese;
Pro addorare sa tua grandesa
Permitti d’ ‘enner a sos tuos pese,
Diana, ch'addorant sos Rese,
Et 'eo puru ti cherzo addorare.

4.
Si m'has amore est cosa manifesta
Da chi mai s'amore istat cuadu;
O cando andas a missa sa di' 'e festa,
Bella, mi dias haer avvisadu:
S'amore mai in passu no si restat
Si no giomper a bider sonn'amadu,
Dai totu assioma est assentadu
Amore cum amore has a pagare.

5.
S'est beru ch'has a mie istimassione
De una 'olta ti des reduire,
Ca no discansat sa mia persone;
Donosa, no mi lasses pius finire
Si ti faghet s'amore implessione
No mi 'atas a puntu de mi 'occhire.
Daem'avvisu cando has a bessire,
Narami cando, e ue has a passare.

6.
Signalami su tempus ei s'hora
Ei su logu pro andare a inie;
Pro 'ider sa tua cara, hermosa Flora,
In sa chida signalami una die;
Daemi avvisu cando 'essis a fora
Ch'hap'a bolare pro 'ider a tie;
Nisciuna cosa det parare a mie
Mancari siat cudd'ala de mare.

7.
Ponemiche in sos mares de Ispagna,
O ponemiche in s'ultimu Oriente,
Ponemiche in sos buscos de Alemagna
O in sas arenas de sa Libia ardente,
No b'hat, no, ne mares ne muntagnas,
Chi m'impedant de benner prontamente;
Pro 'ider sa chi addoro solamente
Dia totu su mundu attraessare.

8.
Ponemiche in s'Ozzeanu a cudda banda
Chi s'universu abbrazzat et inserrat,
O in sa Moscovita, o in Olanda,
In Franza, Portugallu, o Inghilterra
Si Flora, bella mia, mi cumandas:
Flora chi cum s'amore faghes gherra,
In s'America ch'est in subta terra,
A s'Europa ca dia giumpare.

9.
De ‘olare m'has postu in sos regiros
Ca mi pares de s'arte perfessione,
In dillirios do si no ti miro,
Sende attesu mi finis sa persone,
Sende accurzu mi das mortales tiro';
Tiro' d'amore senza cumpassione,
Sos lamentos ti fattant implessione;
Ite nd'has de mi fagher regirare?

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!