T’ap’’idu
ammuntadu ‘e mudore,
solu,
in bratzos de rena…
ninnadu
da un’unda furistera
mai istracca ‘ e cargnos…

Drommias, foltzis…
ninnu meu…
afferradu a sos bisos,
ispaltighinados,
in su fundu e su mare;
apprenciadu…
a unu sinu sena titas,
sena mulmutos,
ne ninnias connottas.

M’as isoltu sas benas
arridadas,
da su malu coro
e sos binujios
como si mugian,
in traschias de pentzamentos…
in pigias de piedade
ammuinada…
da su filuferru
de sas lacanas furisteras.

Angheleddu…
drommi ancora,
non t’ischides…
ca rodiende,
apiatzu,
as a bolare…
in aeras d’ambaghe,
tebias d’assulenu,
cun sas tempras rujas,
basadas…sena tempus
da un’avreschida noa,
in recatos d’incantu
druches che- i su mele.

Drommi, angheleddu…
e no timas piusu.
… anninnia…anninnia…

Terzo premio Sezione B Poesie Verso Libero - Premio Poesia Sarda Caragnani - Calangianus 12-03-2016