Sas andalas de sas vidas mortales
in terra sarda perden sa lumera:
s'istudat cun sa lughe donz'ispera
de nd' 'ider galu similes e tales

isteddos che a tie nen chentales
de poesia pienos a manera
chi, Paulu, cun tegus fit liera
sa dansa de sas musas. Cattedrales

nen tempios, monumentos isulanos
connosco chi la pottan agualare
s'opèra de sos talentos umanos

ch'in doda lassas, s'arte singulare
distinta de sos versos prus galanos
ca generosu fis in su fraigare...