Mal’assentadas paren sas ideas
in custa notte iscura‘e Sant’Andria
prena‘e tropeas a cresura ia
assentiladas in largas peleas
millas! chi truvan custas oras feas
chin su punturzu a punta riscarfia.

Intrade ideas craras in su fadu
in pannos d’amistade a fune isorta
s’imprenta de s’anticu no est morta
a prende intro su coro su contadu
aperide sa janna‘e su creadu
no est forte che attarzu prus cuntorta.

Rupide torra in terra sas zenias
de mammas de nuraghes a s’assutta
allegan crepaduras’a sa mutta
de predas mannas chi paren dromias
sa rughe de cada anima ch’est rutta
est galu a ziru in ruttas e lapias.

Benide bos intendo in sa tempesta
in s’alinu‘e sa notte sos manzanos
a focu tentu in mesu sos beranos
che virzines prus prontas’a sa festa
che isteddu chi nd’istrissiat in nottesta
a sinzolare a bonu custos pranos.

Irvetto intas a tardu unu cussizu
de chimas prus froridas de cossolu
porridas dae columbas in su olu
che pane postu in manu a cada fizu
intrade intro cust’anima a trighizu
pintademi su tempus a sa solu.

Intrade chin sas caras chene gherra
che feras timicosas in sas gamas
intrade a fache nidu che-i sas mamas
chi chircana sa pache in d’una terra
chin laras chi travallana sa serra
intrade a brasa allutta chin sas framas.

Intrade ideas bonas in s’iscuru
cantande che puzone in sas arturas
toddide a sa Barbagia sas cresuras
chi cunzana s’omertade de sicuru.

3-premio Oschiri anno 2000