Frumene mannu

Andat lentu su frumene 'e sa vida
in sos caminos de s'eternidade
leandeśche chertos e amistade
chi sa pettorra lassana ferida.

Andat lentu, a su mare de s'arcanu,
trazande milli contos e un'ostinu
andat lentu, lassande in su terrinu,
de lastimosa mutria unu pantanu.

Andat lentu e m'abizo 'e no ischire
in sa currente forte prus nadare
e m'intendo che truncu abbandonare
da-e s'indolente presse in su fuire.

Su casteddu d'isperas lugorosas
in d'una nue pruer s'est ziradu
da-e su 'entu 'e sos annos solovradu
sutta sas manos fortes e operosas.

Manos chi ischidu no han trattennere
sas prenda de incantu e galania
ditzosas che unu 'olu 'e pitzinnia
in su tempus present'e gal'a bennere.

M'isto chin sa pantamas de sa mente
patinde 'e sa 'etzesa donni'affrontu
chin s'alinu iscurosu 'e su tramontu
chi mi brivat de lughe e de caente.

In su frittu desertu 'e sa paura
bido craru su vasu de Pandora
da-e su cale bessidu nde so' fora
po sighire su ciclu 'e sa natura.

Lassand'in segus fertas e illusiones
chin frorin in sas andalas terrenas
e sizire sa 'oghe 'e sa sirenas
chi cantana d'isperas e passiones.

Chi cantan d'una tanca a frores d'oro
e dan a sos intzertos un'indissiu,
chi cantan de sa die 'e su zudissiu
inue s'urtima paga hat donnia coro.

Est cantu da ammaju e de traschia
po unu caminu chene torradorzu
inue sa lughe indittat s'iscusorzu
fattu d'eternidade e de poesia.

Angelo Carta Brocca (Dorgali)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!