Fraigare
de Budroni e Piredda

Gara poetica – Tema

Budroni
Sa parte esordiale at terminadu
e sa pausa fatta unu mamentu;
ma su nostru gentile cummitadu
de una bella idea in parte at tentu,
chi 'attidu nos at un'argumentu,
nos l'amus in ambos sorteggiadu;
su ch'apo deo bo lu fatt'ischire
m'est toccadu in tema a distruire.

Piredda
Cun bene ca s'esordiu cun cura
l'amus sa prima parte terminada,
ma como intantu sa dea bendada
su tema nos lu passat in procura;
e s'ora de cantare est arrivada,
ispremer sos talentos de natura;
tue ses in sa terra a distruire
m'est toccada sa parte a costruire.

Budroni
E da-i custu non podimus fuère
e s'argumentu toccat de sighire;
a s'ignorante a li fagher ischire,
chena a manutenta 'e lu condùere,
est bellu in custa vida de costrùere
ma pro costrùere bisonzat distruire;
ca de sa parte nobile ch'isettat
pro nd'edificare si ndi 'ettat.

Piredda
Addaghi dan sos temas in gara
de los cantare non podet transire;
ma sa zente bi devet arrivire,
chi cosa manna non s'an postu a pala;
si tenes unu fizu conca mala,
non lu deves , Barore, distruire,
ca l'insegnas s'idea interiosa
si at de costruire carchi cosa.

Budroni
Però distrue a chie faghet male,
ca, daghi lu distruis, bene istas;
tota sa zente sana naturale
calchi cosa de bonu est chi nd'achistas;
nara si cheren distruttos sos nazistas
o puru calch'ater'unu criminale,
su chi pro nudda non ti deet increscher,
tando cuntèntadi e làssalos crescher. [...]