FIUDU


Et como preco… omine m’intendo,
Torradu a bestire debilesa,
Et de tristura su coro m’inchendo.

Totus sas bortas, solu, ch’ intr’ a cesa,
Infund’ ‘e lacrimas sas manos mias
Chi mi parant sos ojos; tant’ est resa

Cust’ anim’ a sas milli maladias
Ch’ afligint unu coro. Piedade,
Pro chi, Deus, mi mustres et mi dias,

A custos muros faco; realtade
Ch’ est crud’ et difitzìle d’atzetare:
Umana sorte bestit s’umiltade...

Et reduidu so com’ a precare...
Daemi torr’ a nou su carignu
Chi fachet sos tochedhos abivare;

Ca so galu fidele a s’impignu,
Daemi su carignu torr’ a nou.
Precande chi mi dias unu signu,

Iseto galu su carignu tou
Chi mi torrat su cor’ a cuntentare.
Sas penas mi turmentant tant’ a prou

Pro chi disiz’ et benz’ a ti precare,
Pro chi torres a facher a manera
De mi poder’ a nou carignare,

Pro mi dare cossolu, un’ispera
Chi mi facat de luche su manzanu
Et ch’ infatu mi piche cada sera,

Cando m’imbar’ in petus custa manu,
O cand’ in campusantu chirc’ a tie;
Ma sol’ in d’una losa ch’ est lontanu

Ti bido, et m’ammentas cussa die
Chi, paris cuntemplande s’aurora,
Chin sos ojos lughentes rie-rie,

Chi su coro mi palpitat ancora,
Chin manos de vellutu mi daìas
Carignos chi prenavant onzi ora

De sas prendas suaves chi tenias.
S’anedhu tenes galu, pro destinu,
Ca isco, tantu forte mi cherias;

Cantos basos veladu t’hap’ in sinu,
Inue custa conca si pasavat,
Et como, cando preco Deus Trinu,

Sa vijone ch’ in pache mi torravat
Mi ponete su cor’ in arguai.
Sa manu tua chi mi carignavat

L’intendo galu, non ses morta mai:
S’amor’ eternu chi t’hapo zuradu
Bivet pro semper; ispero chissai

De lomper a su mundu incantadu
Inue che anghèla post’ has pese.
Mi mancas tantu, frore profumadu,
Daem’ unu carignu, si bi sese...

Antonio Brundu

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!