Fisti tue
de Antonio Rossi

Sas pumas coloradas de unu rusignolu armonicu ‘olaian,
su ‘entu fit lezeri e carignaiat sos armuttos drommidos;
tando eo ‘idio unu sognu chi giogaiat cun sas rundines
e lu sighio in sos tramuntos aundados de mariposas.

Fisti tue chi pintaias su chelu de nues suttiles
cun pinzelladas de arlicchinu lentore,
fisti tue vela de seda e unda sulena
chi sezzias su mare de s’amore.

Fisti tue chi impiueraias sos angelos incantados
cun farina de nie falada da-e sa luna,
fisti tue vena de abba e bianca rosa
chi ispuntaias in sas aurosas luminosas.

Sas laras delicadas de unu caddu marrischeddaian,
su riu istrasinaiat sirenas de pabiru mes’alluttu,
tando eo ‘idio una lughe ch’isguttaiat da-e sas istellas
e la sighio in sas semidas de sas giogas doradas.

Fisti tue ch’isgiarias sas nottes de sas fadas
provochende ischintiddas cun sas coas de sos culilughes,
fisti tue cignu donosu e abe reina
chi dansaias subra sos bungios impoddinados.

Fisti tue ch’intraias in sa neula mattutina
e abberias un’aidu a su brundu sole,
fisti tue sambene caldu e flussu ‘e mele
chi coberias de dulchesa sa vida mia.

Fisti tue chi pintaias su chelu de nues suttiles.