Est sero. A lu mirare est un’incantu
custu sole calende lenu-lenu;
e-i su mare pàsidu e silenu
chi l’isetat in d’unu àsulu mantu.

Sun sas maghias in s’ala ‘e ponente
chi sa natura mustrat ispantosas
a totu sas pupias curiosas
de s’abratzu immortale e atraente.

A mie ch’ispantadu so mirende
a chizu fissu su giogu amorosu,
su sole pende-pende lastimosu
cun d’unu ragiu chi mi paret nende:

«Deo su ch’apo pótidu apo dadu
po chi non tenza limba e ne sentidu,
finas oe su giru apo cumpridu.
E tue che poeta it’as cantadu?»

Cantad’apo de baddes e pianas,
de matas e fiores beraniles,
de montes e de mandras e cuiles,
de rios aundados e funtanas,

de òdios, de gherras e de paghes,
amores cumintzados e finidos,
sognos beros e sognos aultidos,
de pinnetas lanidas e nuraghes.

Sos giogos tuos bidos custu sero
cussos cantados non los apo ancora;
paro fronte a sa sorte traitora
si sa musa m’azuat cant’ispero.

Los cheria cantare a sa pitzinna
bénnida a custu mundu chena lughes,
giughinde subra palas milli rughes
totu pesantes, de ferru e de linna.

Finas a oe su destinu est gai!
e tue sole chi culpa non nd’asa
fortzis a issa la cuntentas crasa,
o fortzis non t’at a mirare mai…

Seconda classificata (sez. rima) V ediz. "Premio Biennale de Poesia Sarda - A pes de Santu Padre" - 2017 Bortigale