Salvatore Ladu

Cantu de abba sa terra in beranu

At bisonzu e su campu fioriu

Gasi matassi tocheddat sidiu

Su coro e, frittu de affetu umanu.

Disizande una manu chi astringat

Sa mea chi est debile insicura.

Una dusina de vasos a fura

Una dea chi m'amada e lusingat.

Duos ocros chi ridan che sa die

Allentorada su manzanu in frore

Chi mandene messazos de amore

Indiritzados, solamente a mie.

Una chi amet su chelu isteddadu

E chi los contede a unos a unu

Pro milos regalare cantos sunu.

Chi non m'isfozzet su libru serrau.

Ue s'agattan penas e turmentos

Nues iscuras, pazinas de lutos

Undas de ludu, prantos e sucutos

Framas de fogu, muilados bentos

Tott'iscrita a maduru, sa traschia

In cussorzas sidias, ispinadas

Umidos muros e zannas ferradas

Ch'an sinnadu s'andada pitzinnia.

Eppuru non m'arrendo, cherzo pascher

Pasturas noas, ispigas biundas

E navigare unu mare chen'undas

Cherzo viver de nou, a nou nascher.

Non cherzo prangher prus a chizu assutu

Ma ispirare in aghera pulia

Chi m'imbriaghen frunzas de olia

Chi allaten perdonu e, vattan fruttu.

In coro solu tocheddos d'amore

Cherz'intender, de paghe sos disizzos

Tort'a inghiriu a cresuras de lizos

Messande pane impastadu 'e suore.