S'Emigradu
di Salvatore Enne

Dae custa montagna, infrittorida,
bos iscrio cun tantu 'e nostalgia
e ancora cun coro inteneridu,

c'hapo lassadu sa idda nadia
pro enner'emigrante a-i cust'ala,
attesu da sa sarda terra mia.

Inoghe aria ona e zente mala
chi su coro mi ponet in turmentu,
sos Elveticos tottu 'ebassa iscala.

A su postu de tenner godimentu,
ca c'hat triballu e bonu est su mensile,
manc'una die che colo cuntentu.

A bortas mi nde peso a manzanile
isperand'e passare unad'iona
che anzones chi zogan in abrile.

Dia cherrer lassare custa zona,
ca sò dae Sardigna tropp'attesu
e non nd'hapo nuraghes a corona.

Poi, ca sò naschidu marghinesu,
inie dia cherrer'imbezzare
cun paesanos mios post'in mesu.

Sa mente non s'istrcat de pensare
a parentes e amigos fidados
ch'in bidda hapo devidu lassare;

non poden esser mai ismentigados
cussos amigos, de sa pizzinnia,
tott'in su coro los tenzo ligados.

Si ness'a bolu andare bi podia,
sa Sardigna intre'a visitare
e sa coghina inu'est mamma mia,

mancu pro brulla che dia torrare
ca si m'agato in su foghile meu
s'isvizzera mi dia irmentigare

però cunfido cun s'azzudu e Deus
ca so de bi torrare isperanziosu
e aer in Sardinna onzirecreu.

Sento chi sò nostalgicu e pensosu

ca finz'una pizzinn'hapo lassadu
in su Marghine, lidu affettuosu:

e deo sò ancora innamoradu
de cussa bella amabile figura,
issa puru amore mi hat zuradu.

Da' su Gottardu como a sa bassura,
creide, prestu cheria torrare,
in bidda istare a sa segura
cisa nostalgia irmentigare.

(Bolotana)