Bisos canos tardios s’ingalenan
cun sas rosas a dada ’olta die.
Sas punnas andantanas s’assulenan
gai che lentos fioccos de nie;

a manu tenta han dadu e han retzidu
pro intritzare trinas de bellesa
lassende a sulcu abbertu su cumpridu
chi non s’istudet sa fiama atzesa.

E galu dudas pensosas s’acceran
ca b’hat pius atunzos che beranos.
S’incùrtzian sas lunas e si seran
chi sempr’in mancu b’hat semen’in manos.

Ma che deris sos primos fiamores
ingràidan laorzos de profettu;
e fintz’in passos de surdos siccores
sighin a bentulare trigu nettu…

S’ojada longa de su ’enidore
non porrit ondras a sas vanidades
e s’hat contivizadu su fiore
partit s’incunza cun tottu sos frades.

Gai sos sinnos santos de s’erèntzia
non chircan binzas a biradas tortas
ca su possessu chena sabièntzia
ruet debbadas subra chervas mortas.

-----------------------
assulenare - quietare, calmare, tranquillizare. cumpridu - qui, compiuto, fatto. s’incùrtzian…- riferito alle fasi della luna, quindi al tempo che trascorre. 4. siccore - aridità, sterilità. porrire - porgere, offrire; concedere. ondra - onore, onoranze; ornamento. partit, partire - dividere, condividere. biradas… - i filari (storti, in tutti i sensi) della vigna, delle viti, ecc. possessu - proprietà, possesso, possedimento. debbadas, indebadas - invano, inutilmente.

Frearzu 2022