Duru duru pro Gemma
di Larentu Pusceddu

Duru duru pro Gemma
A duru duru duru duru
A duru duru duru sia,

1 - Sas terras de Baronia
dae oe sun prus bellas,
In mesu de sas istellas
b’est luchente Gemma nostra,

2 - Su puddu sa cocorostra
arritzat chichiriande,
No istedas dimandande
si est bella che una Dea,

3 - Nemos nd’at un’idea
ca de issa est prus ermosa
Diventes sa prus famosa
prus famosa de una reina,

4 -Cando si pesat sa frina
Infriscat sos manzaniles,
Intendas boches zentiles
che chitarra a serentina,

5 - Su truncu sa raicrina
juchet forte che su ferru,
S’istajone de s’ierru
pro tene siat beranu,

6 - Cando t’essit pilu canu
contes prus de annos chentu,
Apas in cada momentu
salude e bona fortuna,

7 - Su sero bessit sa luna
chi si cuat cando t‘iden,
non cheret chi a tie miren
ca l’annuas sa bellesa,

8 - Sias pro sa zentilesa
dae sa zente muntovada,
Si caminas in picada
ti parzas sempre in pranu,

9 - T’ischides cada manzanu
cun su risitu jucundu,
Sias famosa in su mundu
che a Grassia Deledda,

10 - Sas mugras s’unin in chedda
pro pascher in sa costera,
Sias che Eleonera
sa reina de Arborea,

11 - Sa fruttura s’est intera
at un’ateru sapore,
che ispica in su laore
maduru jucas su ranu,

12 - Bessin sempre in beranu
frores de cada colore,
Ti donen sempre amore
ca ses digna lu merìtas,

13 - A sa domo inue istas
benzat semper zente bona,
Cun chitarras sona sona
ti canten sas serenadas,

14 - Poesias incantadas
nias ammaliadoras,
In mesu de sas isposas
sa prus sapia sias tue,

15 - Ti connoscan in totue
pro s’iscenza e s’ermosura,
Mai sunfras sa tristura
fadada che mariposa,

16 - In giardinu ses sa rosa
aturdis totu sos frores,
Che torture sos cantores
los bincas pro melodia,

17 - Sa bida in armonia
la vivas a piachere ,
In s’amore deves crere
ca s’amore t’at donada,

18 - Si fachen bella nadada
tazos de piches in mare
Jeo ti scherzo cantare
cuntentu custa ninnia,

A duru duru duru duru
A duru duru duru sia.

Mannoi Pusceddu - Siniscola - Vintitres de Maju de su Duamiza e Chimbe