Duru duru de sa pitzinnia
di Larentu Pusceddu

(A fiza mia)

A duruduru duru sia

Cantones de allegria
Intendas totta sa vida
Dominica tottu chida
Siat pro tene fiore.

Serenadas su cantore
Ti facat pro sa bellesa
Ch'incantat pro sa finesa
Pro sos colores atzesos.

Brillan sos ocros inchesos
Che furru de sole de maju
Pettichedda de saccaju
Mai ti manchet dae mesa.

E su pane fattu a fresa
Coloridu ti consolet
Sa tristura mai bi colet
In s'oru de sa carreda.

S'isposu t'istimet meda
Ca meritas solu istima
Cun milli versos in rima
Canten sa tua virtude.

Domas su caddittu rude
Cun d'una sola mirada
Fachimula sa cantada
Onora sa pitzinnia
Duruduru duru sia.

(Inedita)