Duas fozas de laru..
di Giovanni Piga

Duas fozas de laru
las carignat su ‘entu,
in d-un’ala ‘e preda,
chin sas laras fegundas.

Duas fozas de laru…

Sa ment’est chen’assentu:
non tesset pius seda
ne mùrmuros de undas
sene su tou amparu.

In sa carrera ‘e domo
an ghettadu sa ‘oghe
ch’in cudd’àteru logu
‘enden tempus baratu.

In sa carrera ‘e domo…

Sun che riu in sa foghe
sas venas mias de fogu
cando penso a su fatu
chi ses anzena como.

In d-unu riu sicu
est chirchende frescura
una gama sidia
mìliende a istraju.

In d-unu riu sicu…

Est tuncende ternura
su cor’orfan’ ‘e ghia
ispetende a ispaju
d’amore nou s’aficu.

A s’alvèschida calas
de lentores ‘estia
a murmutu ‘e frinas
‘elada ‘e incantu.

A s’alvèschida calas…

Tristura e carestia
in sos ojos che grinas
mi lughen a ispantu
… si mi faghes de alas.

Ispigas a dejunu
m’at dadu pro incunza
custa miser’annada
de sicagna ‘e fadigas.

Ispigas a dejunu…

Dami su coro, e cunza
sa janna ispalatada
de s’anima, ‘e istigas
non lesses pro niunu.

In mesu ‘e su laore
una chìgula isposa
cantat notas de vida
noa in coro ‘e s’istiu.

In mesu ‘e su laore…

S’ànima tua, Rosa,
est froa ‘e chelu niida
carignu ‘e sole, riu
de lampizos d’amore.

Un’antigu deìnu
connoschet a sos signos
s’arcan’ ‘e su ‘enente
in s’andera ‘e sos annos.

Un’antigu deìnu…

Mi sun gosu e carignos:
sas dudas de sa mente
de s’oju sos impannos
si m’oferis su sinu…

TERZO PREMIO ALLA X EDIZIONE DEL PREMIO GURULIS VETUS DI PADRIA LA POESIA PER IL CANTO NEL RICORDO DI GAVINO DE LUNAS