Divisiones de Sardigna
de Salvatore Poddighe

 

Giudicadu de Karalis

1
Istòricos, antigos documentos
leggende de Corona e de Siotto
in giudicados o dipartimentos
chi fit divisa sa Sardigna noto,
degh'annos prima de su settighentos
a milli e battoschentos settantotto:
Karalis fin sos nùmenes insoro,
Arborea, Gallura e Logudoro.

2
Si narian a puntu giudicados
ca de unu zuighe fini rettos.
Sos pòpulos comente sos soldados
a su cumandu insoro fin suggettos.
Benian in su tronu collocados
custos, a prepotenzia o elettos.
E in tale sistema guvernada
otto séculos s'isula est istada.

3
Deghessette contradas o regiones
a su Cagliaritanu appartenian:
custas funi de terra estensiones
chi biddas e zitades cuntenian.
Bìndighi fini sas divisiones
chi d'Arborea guvernu tenian
e vinti Logudoro, otto Gallura
nd’aian in domìniu o in cura.

4
Su nùmene chi dadu antigamente
han a dogni regione o curatòria
m'est dovere a su pubblicu presente
ponner, comente l’agato in s’istòria
cun dogni bidda in issas esistente
o distruttas da època antigòria:
racconto totu in limbazu poéticu
coment'andat in ordine alfabéticu.

5
De Sadali, Esterzili sa contrada
cun Seulo, Seui e Ussassai
Barbagia de Seulo fit giamada
Anticamente, e oe puru est gai:
regione montuosa e-d-elevada,
fèrtile de nutzolas cantu mai,
de nughes, selvagginas e armentos
ricca, e de minerales giacimentos.

6
Assèmini, Burcei, Elmas, Quartu,
Selargius, Quartucciu, Monserradu,
Séttimu, Sinnai, in logu pius artu
de Pirri, Sestu e Mara collocadu:
fit totucantu s'interu repartu
Campidanu de Kàralis giamadu.
Kàralis posta in-d-un’amena altura
mirat tota sa vasta pianura.

7
Toccan de su Cixerri a sa distesa
Domosnoas e Fluminimaggiore,
Villamassargia, Iglesias, Gonnesa,
Portoscuso, Musei, 'idda minore,
zona de minerària ricchesa
de Sardigna sa prus superiore.
Duos casteddos noto e una gruta
d'época antiga e Corongiu distruta.

8
Decimomannu cun Villaspeciosa,
Santusparau, Siliqua e Uta
sa contrada de Decimu vastosa
fòrmana riccas d'ortaglias e frutta
parte in pranura, parte montuosa
comente sa natura l'hat costrutta.
Su Riu Mannu hat cun su Karalita
a su casteddu de s'Acquafrita.

9
A su Gerrei toccan sos villaggios
de Silius e Santu Nicolau.
Riccos de mineràrios vantaggios
sun Biddasartu, Armungia cun Ballau,
sorgente minerales bi nd'hat paggios
ch'a sa Basilicata naran ciau:
de paludes, de pisca bundanziosa
e traversada est da su Flumendosa.

10
Segundu sos istòricos romanzos
est sola Villacidro in Ippis susu.
Binzas, ortos, giardinos de aranzos
bundan sempre in issa prus e prusu:
sas cariasas, sos cedros licanzos
in dogn’ ‘idda de béndere han a usu.
Hat abbas friscas, fertiles campagnas
d'agricoltura, forestas, muntagnas.

11
Biddesorres unida a Biddermosa,
a Serramanna cun Decimopuzzu
fit Ippis giosso, campagna ubertosa
chi messat farche e béntulat triuzzu.
S'abba termale, sa ferruginosa
in duos sitos bessit a ispruzzu.
Binzas, ortaglias e figos moriscas
bundantes sun in sas campagnas friscas.

12
Isula Santupedru Carloforte
giamaiat s'antiga dominària.
Issa sola in Sardigna hat tentu sorte
d'haer in mares suos sa tonària:
piscat dogn'annu, in sa rezzada corte,
tunninas pius d’una miliària.
Oltres de custa, est zona distinta
de minerales ùtiles pro tinta.

13
Cabuterra cun Domos de Maria,
Santupedru cun Pula e cun Sarrocco,
Nora giamada, sende Nora bia
oe dìstrutta, a bocchi-chi-ti-'occo.
Minieras de ferru in cussa via,
sales, abbas termales bio e tocco,
s'apicoltura, su mele licante,
binzas, aranzos, méndula bundante.

14
Nuràmene an giamadu su pendiu
chi s'agatat Seddori e Biddarega,
Nuràminis, Serrenti e Segariu,
Samassi cun Furtei tottu in lega
ozu incunzan s’ierru e in s’istiu,
gustosu zafferanu e mele in tega.
Un’antigu casteddu e seporturas
gigantescas bi noto e pedras duras.

15
Àrzana, Girasole e Baunei,
sun in s'Ozastra settentrionale,
Biddamanna, Talana cun Triei,
ue fit sa zittade de Ardale.
B'est puru Lotzorai e Urzulei
in cussa terra ricca ‘e minerale,
de forestas, castanzas e nuzzolas,
de sirbones arestes e crabolas.

16
Sa meridionale Ozastra ricca
de minerales noto e de olia.
De binos eccellentes magnifìca,
sas castanzas gareggian a porfia.
Ierzu, Gairu, Elini pitticca,
Loceri, Ilbono, Osini, Tertenia,
cun Ulassai, e li sun d'istendardu
Tortolì, Lanusei e Bari Sardu.

17
Ue est Barrali e Donori, giamàna,
in su tempus antigu, Parteolla:
unida a Muristene e Serdiana
cun Samatzai, e giustu est chi regolla
a Santu Pantaleo, Sicci, Ussàna
in custa zona fèrtile e satolla
de trigu, bestiàmine e de casu
chi cummercian a cùccuru e a rasu.

18
Fit Calasetta cun Sant'Antiogu
distintu cun su numen de su santu.
Binzas, pischeras b'hat in custu logu
chi si lu bider causat ispantu:
a cantu curret vista e bidet ogu
mare e terra figurat un’incantu.
Ue est s'antiga Sulci decorada
Sant'Antiogu bistesit fundada.

19
Pedrasdefogu unidu a Muravera
cun Biddepuzzu ancora e Santuidu
Sàrrabus fit giamadu in s'antighera,
logu de minieras favoridu.
Sa marittima sua riviera
méndulas e aranzos produidu
hat e fruttas diversas a dogn'annu,
narat s’istòria, in numeru mannu.

20
Escroca, Donigala, Escalaplanu
Gèsico, Goni, Gergei cun Mandas,
Orroli, Serri, Nurri e da lontanu
bides a Biddanoa, si be-i andas:
custa contrada, montagna e pianu
fit giamada Seurgos si dimandas.
Duas zirtades antigas b'agatas
chi sun Biora e Mulargia, disfattas.

21
Sulcis fit Teulada cun Santade,
Palmas Suergiu, unida a Serbariu,
Tratalias, Narcau e puru frade,
o sorre, a custa est Biddaeriu.
De Tégula, giamada sa zittade,
oe sepulta dormit in obliu
in custa zona ricca de potentes,
de minerale e diversas sorgentes.

22
Arixi, Guasila e Pramantellu
sunu de sa Trexenta in sa contrada,
Guamaggiore, Sélegas, Suellu,
cun Ortacesu e Senorbì giamada,
Santu Basili e Sant'Andria bellu,
Sìsini, e duas àteras bi nd'hada
in custa zona fértile pro trigu
biddas distruttas da tempus antigu.

Giudicadu de Arborea

1
Hapende già de su Cagliaritanu
giudicadu descrittu ogni contea,
in rima sarda montagna e pianu
passo como a cantare d'Arborea.
A Tharros fit su zùighe sovranu
chi guvernat sa zona tota intrea
ma cando istesit Tharros distruida
fit pro sede Oristanis costruida.

2
Austis si narat sa montuosa
contrada, cun Austis, Teti e Tiana
inue fit sa zittade famosa
chi a nùmene Albina giamaìana:
de buscos e de feras populosa
chi sos contes a cazza b’andaìana
in su tempus antigu, e oe in die
robba 'e cazza no mancat da inie.

3
Belvì, Aritzu, Gadone e Meana
de sa Barbagia 'e Belvì sun in sinu.
Nughes, nuzzolas e castanzas hana
fora de contu in s’insoro terrinu,
bundante bestiamen, casu e lana,
d'ortos fruttas, est totu unu giardinu
d'abbas friscas, cun ràmine e galena
nd'est custa terra fértile piena.

4
Giamaian Barbagia d'Ollolai
ue est Gavoi, Ovodda e Mamoiada,
Ollolai, Lodine, Fonne, Olzai,
Soròvile, zittade sepultada.
Est issa, dai séculos assai,
inue Forine bistesit fundada.
Sutta su Mont'Ispada e Gennargentu
si notan sas ruinas pro ammentu.

5
Campidanu maggiore, Solarussa
fit, Nuraghenieddu e Zeddiana.
Siamaggiore e, unida a-i cussa,
Màssama b'est, Baràtili e Solana,
Riola, Cabras de su mare influssa
Nurache, Donigala non lontana
de su Tirsu chi bagnat e fecundat
cun Zerfaliu, e a bortas l'inundat.

6
Campidanu de Milis fit Santeru,
Bauladu, Bonarcadu, Tramazza,
Seneghe; Narbolia e logu veru
Milis d’aranzos est de d’ogni razza.
Cantu curret su campu totu interu
d'ortos e binzas sa campagna est sazza.
Fit sa zittade esistente in su sinu
de Seralapis in cussu terrinu.

7
Campidanu 'e Simaghes iu giamàna.
a Siamanna cun Siapiccia,
Oristanis, Ollastra, Bidda Urbana,
Palmas, Sanverucongiu in cumpagnia,
Santagiusta, Marrùbiu, chi sovrana
est de logos marinos cussa 'ia.
Simaxis, cun Silì in comitiva
de su Tirsu s’agatan in sa riva.

8
Mandrolisai fit ue est Atzara,
cun Sorgono, Ortueri e Samugheo,
unidamente a Désulo e Tonara
possedit custa zona a cantu isch’eo.
Minerales, forestas, abba rara
frisca, bundante e persuasu seo
chi si nde chircas ancora b'agatas
nughes, nuzzolas, castanzas, patatas.

9
Tuili, Setzu cun Lunamatrona,
Turri, Paule e Mara d'Arborea,
Baressa, Siddi e Gésturi padrona
est d’abba frisca in cussa contea,
Ussaramanna, in sa propria zona
cun Biddanoafranca e Forru intrea,
Las Plassas, cun Baràdili e Barùmene,
e Genuri Marmilla fit de nùmene.

10
Sàrdara, Pabillonis, Gonnos, Uras
Santu 'Ainzu, Terralba, Arcidanu,
Gùspini, Arbus, cun montes e pianuras
forman de Monreale su pianu.
Abbas termales bundantes e puras
b’hat, chi s’òmine infitmu torran sanu.
B'est puru su casteddu ue cumandu
hat tentu Eleonora, memorandu.

11
Parte de Barigadu, Bidoniu,
fit Sorradile, Ardauli, Nughedu,
Allai, in riva de su Tirsu riu,
Ula, Busachi, Iddanoatruschedu.
S'agatat Fordongianus in pendiu,
Neoneli in altura e d'arburedu
est ricca custa zona e de funtanas
d'abbas termales e domos de janas.

12
Ue est Gonnostramatza parte monte
fiat giamadu cun Gonnoscodinas,
Masuddas, Mògoro, in cussu orizonte
cun Morgongiori e Siris, cun bighinas
Sàmala, Pompu, s'agatan a fronte
e Ferru, oe giamadu Collinas,
terra de minerales e ispigas
e de tres biddas distruttas antigas.

13
Giaman parte de Ozier reale,
Bidumaggiore, Ghilarza, Abbasanta.
Paulilatte bellu litorale
tenet chi paret una terra santa:
est custa vasta zona in generale
ricca de bestiamen totucanta,
hat nuraghes antigos a dogn'ala
su casteddu deruttu 'e Giropala.

14
Domosnoas Canales, cun Soddio
Tadasune, Norbello e Boroneddu,
ancora a Zuri, cun Sédilo bio
totus in riva a su lagu noeddu
de su Tirsu; e distruttas bi descrio
Sella, Biole, cun-d-unu casteddu.
Custa zona segundu s'iscrittore
si narat Ozier superiore.

15
Giamaiana parte de Useddos,
ue est Curcuris, Bànnari, Escovedu,
Zèppara, Pau, Figus, paeseddos
sunu terrinos de pagu mattedu.
Ales e Gonnosnò riccos casteddos
sunu de bestiàmene masedu.
Usellos poi, unidu cun Ollastra,
de inu ‘onu, una e àtera est mastra.

16
Isili, Assolo, parte de Valenza
cun Làconi e Nuragos fit giamada.
Genoni, Nurallao, Asuni senza
farta sun in sa propria contrada.
Senis, Nureci e Mogoredda, penza,
Sant'Antoni Ruinas, poi b'hada
una ‘idda distrutta, una zittade
chi fit Valenza, de s'antighidade.

Giudicadu de Logudoro

1
Hapende già cantadu ogni Regione
da s'Arborea passo a Logudoro,
a descrier s'istoria, in cantone
de sas contradas e biddas insoro.
A Turres sede e dominazzione
tenian sos zuighes cun decoro.
Innanti e cando distrutta est istada
Àrdara, fit sa sede cambiada.

2
Algheresa, giamada s'Alighera,
fit cun Puttufigari in cumpagnia
zittadella de mare in riviera
ricca d'ortaglia, de prama e d'olia.
In sinu sou hat un'argentiera,
fortezza, portu 'e mare e pischeria:
fértiles terras de agricoltura,
òttimos binos cun aria pura.

3
Sa contrada d'Ampùrias distrutta
hat s'antiga zittade Juliola.
Tùbula ancora che issa ch'est rutta:
oe, Casteddusardu, regnas sola,
sa cale, a tardu tempus, fit costrutta
da genovesa zente piscajola,
chi in cussu situ andian a piscare
prezziosos corallos dae su mare.

4
Pérfugas, Zaramonte cun Laerru
Sédini, Bulzi, Martis a s'Anglona
appartenen cun Nulvi, senz'aerru:
noto puru chi b’hat in cussa zona
termas bundantes istiu e ijerru
abba ferruginosa tantu bona
chi de sanare tenet sa virtude
medas persones brivas de salude.

5
Puttumaggiore, Pàdria, Romana,
Monteleone, 'Iddanoa, Montresta,
Mara, Bosa, zittade diocesana,
Calmèdia, distrutta dae sa pesta:
duos casteddos devastados b'hana
in pe' su Malispina solu resta
comente monumentos de grandesa
de tota sa contrada bosanesa.

6
Cabuabbas Cherémule e Bessude
Thiesi, Cossoine, unida a Giave
fit giamadu, ca tenet in virtude
chentu e prus venas de abba suave.
Duas zittades brivas de salude
s'agatan de s'antigu tempus grave
in cussa bella e fertile contrada:
un'Afa e una Sùstana giamada.

7
Ittiri bundat ràmene argentinu
in terras suas fattende perforos.
A Ossi, Tissi e Ùsini est vicinu,
a Sulumedu, a Uri toccat oros.
Custa zona de fértile terrinu
antigamente fu giamada coros:
su bestiàmene e s'agricoltura
est sa ricchesa sua imperitura.

8
Ue est Bonorva e Semèstene eretta
si narat Costovalle o Valle costa:
de laorare una terra perfetta
paret da sa natura fatta apposta.
Patria de unu nòbile poeta
Chi mai in su cantare hat dadu sosta,
de bestiàmene e forestas cinta
est una zona tra totu distinta.

9
Sa contrada de Doris, Oniferi
fit, Orotelli, Sarule e Ottana.
Orani, postu in altu sentieri,
gosat pius de totu aria sana.
S'incontat in Ottana su ruderi
de cando fit zittade diocesana:
in sa patria terra sardignola
oe torrada est una 'iddizzola.

10
Figulina giamàna ue fit Crasta,
oe disfatta, e subra sas ruinas
nàschida b'est Ploaghe, ricca e vasta,
de dogni bene e d'abbas alcalinas.
B'est Codronzanos, in custa dinasta,
Muros, Carzeghe, unida a Fiolinas.
Sos villaggios de Beda e Tarareddu
noto distruttos e unu casteddu.

11
Flumenargia giamàna ue fit Turres,
zittade da sas gherras destruida:
in su situ chi oe est Portuturres,
subra de sas ruinas est naschida.
E si a Tàttari poi ti cundurres
l'agatas s'annu milli costruida
dae sos turritanos in esìliu
chi han leadu mie domìciliu.

12
Toccat Bone, Bultei e Goceanu
Bòttida, Benetutti e Isporlatu,
Burgos, Anela, poi manu manu,
sun Illorai e Orune a contattu:
zona buscosa, posta in clima sanu
ricca d'abbas termales da prim'attu.
Abba frisca b'hat puru, in dogni puntu,
unu casteddu distruttu o defuntu.

13
Màrghine fit Silanos e Bolòtana
Bòrore, Macumere e Bortigale,
Dualche e Noragùgumen si nòtana
in su matessi territoriale.
Birori, Lei, e duas si denòtana
zittades de su medioevale
distruttas d'aspra gherra sambenària:
una giamada Berre, una Molària.

14
Ue sunu Bunnànnaru e Borutta
si narat, in antigu Meilogu
Bànari, Sìligo e Turralva, sutta
sun a làcana a pare in custu logu:
Sorra, s’antiga zittade, distrutta
istesit dae pesta, gherra e fogu
chi ricca e bella fit una delìzzia
in custa terra fèrtile a dovìzzia.

15
Alà, Òschiri. Nule e Montacutu
toccat Berchidda, Tula e Buddusò,
Ittireddu, Pattada, Osidda, Argutu,
Monti, Nughedu Santu Nicolò,
Othieri, Bantine, a rifiutu
hat abba pro nde nascher unu Po.
D'antigos tempos otto paeseddos
noto distruttos e duos casteddos.

16
Cùglieri, Sennarìolo e Iscanu,
appartenian a su Monteferru.
Santulussurgiu in-d-un'altipianu
circundada est de chercos totu a serru.
Cornus, Gulurinoa unu vulcanu
s’agatan oe postos in sutterru:
zona ricca de abba e minieras,
de olias, de buscos e de feras.

17
Oppia fit su nomen regionale
de ue est oe sa 'idda de Mores
cun Àrdara chi fit sa capitale
de Logudoro e tentu has sos onores
de sede vescovile e giudicale
ma sas gherras, incéndios e terrores
dae zittade manna, bella e ricca
torrada l'hana pòvera e pitticca.

18
Sa regione osilesa, Osilo sola
restat in s'altu monte Tufudesu,
ue manizan su fusu, s’ispola
sas bonas mastras chi tessen su fresu:
dae sa sua isplèndida, alta mola
si osservan sos mares dae tesu.
Fértiles terras tenet de culturas,
vèneres bellas chi paren pinturas.

19
Planargia fit giamada ue est Flussio
Mòdolo, Magumadas e Tinnura.
Sindia, Suni, cun Sàgama bio
de cussu altipianu in sa pianura,
unidu a Tresnuraghes chi descrio
òttimu paradisu de bellura,
circundadu de binzas e de mare
logu delizziosu de abitare.

20
Si naràt in antigu Romania
Inue est Sorso e Sennori esistente.
Sa coltivazzione a larga via
faghet de su tabaccu custa zente:
a dispettu de Franza e de Turchia,
in Logudoro no mancat niente:
issu produit con attividade
cantu bisonzat a s'umanidade.

Giudicadu de Gallura


1
De Logudoro, pro me terra cara,
hapende già finidu, cun premura
a passos longos m'avvio a Limbara,
pro chi descria giòmpidu a s'altura
dogni bidda o zittade a vista giara
appartenente a sa forte Gallura
pro las dare a su pubblicu presente
sa ch'est distrutta e sa ch'est esistente

2
A cantu narat s'istòricu amigu
Bitti fit ue distrutta est istada
Dure da tempus remotu e antigu
e istesit de nou edificada:
Bitti, chi pro Sardigna est un'isprigu,
Onanì, Gorofai registrada
s’agatat puru in sa matessi zona
cun-d-una miniera ricca e bona.

3
Géminis fit giamadu, si leggides
s'istoria, Aggius, Bortigiadas, Luras.
Calangianus e Nuchis, bene ischides,
gosan de su Limbara sas friscuras
cun Témpiu, e costrutta la 'idides
subra de sas paternas sepolturas
de Gemellas, zittade primitiva:
oe distrutta, no contat prus viva.

4
Ìsulas intermèdias giamàna
Sa Maddalena aunida a sa Caprera
ue s'eroe de s'italiana
unidade hat sa tumba cadavera.
De cavas de granitu e puzzolana
si podet narrer issa terra vera:
amenu logu, si l’’ides l'apprezzas
fortificadu cun tantas fortezzas.

5
Nuoro fit giamadu su terrinu
d'Orgòsolo, Nuoro e Oliena.
Est tota custa zona unu giardinu
d'olias, binzas, forestas piena.
Nuoro, chi virtudes hat in sinu,
contat zittade in custa parte amena:
sas forestas, sa grande pastorìzzia
forman de issa ricchesa e delìzzia.

6
Orfìdes si naràt antigamente
sa terra ue s'agatat in collina,
oe Santa Teresa, gaudente
de Bonifaciu a sa ‘ucca vicina.
Passat dae inie in continente
su telégrafu filu, sa marina.
Su distruttu casteddu de Longone
noto, d'antiga denominascione.

7
Sa regione 'e Posada, fit Posada
a Siniscola unida e a Torpè.
Vivet a custas puru assozziada
in bascia 'adde, sa 'idda 'e Lodè:
una sorgente cun abba salada
salutares virtudes hat in sé.
Noto, distruttu d'antigas battaglias:
unu casteddu zintu de muraglias.

8
Fòrmana d'Orosei su recintu
Irgoli, Galtellì, Lula, Dorgale,
Onifai, cun Lòculi distintu,
de su Cedrinu in sa riva letale.
Òttimas termas s’istoria hat tintu
chi b’hat in cussa terra ‘e minerales.
D'un’antiga zittade a lumen Dòria
si notan sas ruinas pro memòria.

9
Terranova fit s’ùltimu riparu
in sinu de Gallura istabilidu:
tenet portu de mare e bellu sartu
de ortos, fruttas, binzas arricchidu.
Siat da peste, o da samben ispartu,
d'Olbia sa zittade in cussu lidu
fit in antigu pròspera e argutta,
oe da fundamentos est distrutta.

10
Biddas, dipartimentos e contradas
cantesi de Sardigna a una a una.
De Nurra e Chirra, sende ispopuladas,
no nde fattesi menzione alcuna.
Sas frazziones las hapo lassadas
chi sunu sutta d’àtera comuna
in santa paghe senza las cantare
fin’a cando den biddas diventare.

11
In fine avverto, si calchi lettore
no agatat sa patria nadia,
chi de nascher hat tentu s'altu onore
inclusa in sa presente poesia.
Dipendet ch’est frazzione in vigore,
e non bidda comente e-i sa mia
o in època noa costruida,
o puru a cuss'istòricu isfuggida.