Dichiarazione de amore
di Pittanu Moretti

Bella, si ti dispones de mi amare
cun amore costante e verdaderu,
tales chi deo solu ape s'imperu,
intro su coro tou de diamante,
ti giuro ch'in su mundu àter'amante
fidele che a mie mai s'est bidu;
a tie cunsagro tempus e sentidu
e pro te milli vidas tia dare!

Bella, si ti dispones de mi amare!

Non ti promito benes ne richesa,
ca sa fortuna mai mind' at dadu;
anzis cun signalada fieresa,
de sos chi possedia m' at privadu!
Ti promito unu coro infervoradu
d'amore puru, santu e de costànzia
ch'in te sol'at dispostu s'isperànzia
d'una felicìdade senza pare!

Bella, si ti dispones de mi amare!

Unu postu in su coro ap'in riserva,
preparadu a s' incontru de una dea;
zertu no pro Giunone o pro Minerva,
nemmancu pro s' ermosa Citerea;
pro te sola, istella europea,
cunservo custu coro intatu e netu,
ricu de sinzeresa e de afetu
cantu mai nde podes disizare!

Bella, si ti dispones de mi amare!

Che rosa preziada e perla rara
ti tia cunservare eternamente;
de sa matessi vida sa piùs cara,
piùs cara , ‘e sas perlas de oriente,
ca tue ses tesoro sorprendente
de donos e virtudes peregrinas;
ses istella brillante ch' illuminas
cantos si ponen a ti cuntemplare!

Bella, si tì dispones de mì amare!

Podet sa sorte mudare a talentu,
ingrata o crudele o piùs giocunda
ma chi felice siat de cuntentu
o vìtima de sorte furibunda,
in te ispero solu, e mi circunda
sas vias de su coro cun cadenas;
e pro te sos fastìdios, sas penas
mi sun indiferentes a passare!

Bella, si ti dispones de mi amare!

Ma tue, soberana criatura,
no mi lessas penar'in cust'istadu:
nara, senza timore ne paura,
si so respintu o si so azzetadu!
Risponde cun coidadu e premura
ca su coro est confusu ispasimante,
e mill' annos li paret un'istante
chi tue sa risposta podes dare'.

Bella, sì ti dispones de mi amare!

Diciosu deo si so su mortale
destinadu a godire tantu acisu!
Tando sa vida senz' alcunu male
si det passare tot'in gioia e risu!
O vida aventurada, e paradisu
tet esser custa vida de amore;
senza dispiaghere ne dolore
sos annos che minutos ten passare!

Bella, si ti dispones de mi amare!

E si pro isventura o mala sorte,
no azzetas su coro chi ti dono,
tes esser tropu dura o tropu forte
ne àteru ti naro e ti ragiono...
In manu , e su dolore mi abandono
finas chi si consumat custa vida,
e gasi ponzo fine a sa disfida
chi sa sorte mi dat pro m'accabare'.

Bella, si ti dispones de mi amare!