Dia cherrer bivere s'ispantu
'e sa luche de su primu arvòre,
de su respiru su primu sentòre
e de sa 'esta 'e sa Terra s'incantu,

cando l'àsca de irde unu mantu
che manu 'isposa po su primu amore;
e de s'aèra su primu cantore
intendere cheria cussu cantu.

E chi sa mente umana ande' bolande
peri s'ispaziu, chin sa Terra in vista,
e de tottucantu hacher tesoro.

E in funestar de pache, sonniande
de sa scienzia s'umana cunchista
a passu d'astros e sa luche 'e coro.