Cunfortu
di Salvatore Enne

Dae sos annos passados pro Sidore
apo tentu una certa simpatia,
ca s’er distintu che triballadore.

Una orta pregadu l’aia
subit’ispiego in modu cale
de comente obbrigadu m’intendia.

Che vi’ muzzere mia in s’ispidale
infetta in d’unu modu troppu forte,
de sa cerrosi tenia su male.

Cando vicina teniad sa morte,
mama de duos pizzinnos minores,
tando a Sidore li fattesi corte.

Fin duos fizzos che duos fiores
e fini accurzu a essere orfaneddos,
de sa mama cherian sos calores.

Custos duos mios angheleddos
zustu su vintighimbe e Sant’Andria
perden sa mama: poveros piseddos!

Tando de babbu e mama lir faghia
frastimende sa vida disastrosa,
vivende attesu dae s’allegria;

poi de tempus mi naran chi’n Bosa
azzettan’in collegiu a fizzos mios,
sos fruttos de sa mia prim’isposa.

Dopo un annu mi torran sor brios,
s’annu chi fia deo in comitadu,
ca sos amores fin torrande a bios.

A visitare a issos fio andadu,
senza lor bider non podia istare,
appena sos pizzinnos m’an basadu

subitu m’an devidu domandare
proite ancora es chi vivia solu:
cherian una mama a lis chircare.

E dae Bosa nde torrei a bolu
ca unu pagu fia premurosu,
de Sidore tenia su oriolu.

Impress’impress’nde fia in Bardosu,
inie Sidore m’a frimmadu
e mi narada: - sias coidosu,

pig’a bidda ca sese in comitadu,
sos de Simaxis arrivende sunu
e su compitu a tie est affidadu,

però, chena lu narrere a nessunu,
appena cussa zente as sistemadu,
torra a inoghe, caru facci brunu -.

Un’indirizzu bellu già mi ha dadu
su numeru battordighi ‘e Molia:
que bad’unu visu dilicadu.

De’onzi die ispettande lu fia
c’ancora isperaia in s’amore,
aer fizzos, muzzere in domo mia.

Tottu custu lu devo a Sidore
ca m’ha dadu sa forza de affrontare
fadigas cun peleas e malumore.

Como non basto a lu ringraziare
ca si oe m’agato sistemadu
issu solu m’ha cherfidu azzuare.

Za er beru devotu apo pregadu
a Sidore donz’ora, notte e die,
però dae tristu allegru m’ha torradu.

Como de nou raccumando a tie
dae su chelu, ca inie sese,
azzua tottu cantos che a mie.

Chena me, nd’ap’in dom’atteros trese
deves a issos pur’amore dare
ca de te s’imbrenugana a sos pese.

Deo onz’annu ti devo festare
basta forza mi dias e coraggiu
e rima pro che podere terminare

custu cantu pro s’undighi ‘e maggiu.

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!