Comente frades

In d’un’era majarza, traitora
su coro meu faghet tichi taca
ca sun sulande semper prus afaca
sos maladitos bentos gherradores.
Torran sas nues, morin sos colores
de sa paghe ch’a tesu ch’est ancora.

Malos signales! Malas avertentzias
cando in s’aera sulan cussos bentos!
Ingrovinadu in custos pensamentos
dia cherrer mudare tot’in bonu
ma non tenzo poderes e ne donu
de illughidare sas malas cussentzias.

E cando poto canto a boghe manna
sos sentimentos bonos de sa terra.
Canto contr’a sos bentos de sa gherra,
a favore de paghe e amistade;
iscrio rimas po s’umanidade
po chi torret sa lughe in dogni janna.

Canto, iscrio cun veru calore
e ispero m’isculten in totue.
Cudda inchizìda e umbrosa nue
sas intragnas iscanzet a su ‘onu
semenande in sa terra su perdonu
po fagher nascher prantas de amore!

Iscàmpulos e rajos solianos,
lùghidas dies e aeras netas
mi den dare cunfortu. Sos poetas
potan iscrier a rimas coloridas
chi sas disamistades sun finidas
cun totu sos istintos prus metzanos!

S’isperantzia non morit! Est cunsolu
a s’anima chi sufrit e chi penat!
Su dolore s’illebiat e m’allenat
cando semus in medas a gherrare
ca su dimoniu, mal’a dominare,
a lu ‘incher no’ bastat unu solu!

Omines de importu! Chi contades!
Torrad’a semenare su giardinu,
chi dogni frutu crescat genuinu
po biver in totue comente frades!

Antoni Piras

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!