Abba e fogu in zusta misura
suntisi vida et prosperidade
si esazzerada est sa cantidade
morte e disastros cun angustura.

Tropu manna est sa suferentzia
de chi hat perdiu benes e amadu
e cussu babbu de abb' inghiriadu
cun sa creatura senze clementzia.

Mamma de nois est sa natura
nos d'hat gosu et sustentamentu
ma si s'arrennegat faghet paura
e si che leat in-d-unu momentu.

Llamada po su clima fit Sardigna
de totas sas cuntradas imbidiada
inatesa malaita temporada
cun forza distruidora maligna.

Sa istradas in frumenes furriadas
cun foga paurosa e distruidora
affogande cristianos in cuss'ora
e macchinas che fozzas tragadas.

Chie in bassura fiat accuzzada
de sa morte no hat tent'iscampu
si no azzudada 'e calchi Santu
in fine mala che-st'incappada.

Un'isacheu de sardos isconnottu
un'orrore chi hat fatt'ispantu
reduinde zent'onesta in piantu
in-d-unu lampu c'an perdiu tottu.

Tantas vidas oladas prim'e s'ora
in modu rebbestu et disumanu
isperemus chi Deus Soberanu
los eppat cunfortados in cuss'ora.

Ischerriare cun abba e fogu
no est cosa bona et cussizada
ca si zampulant doa o leada
zeneranta morte et disaogu.

Ilartzi su 21 'e Sant'Andria 2013