Chirchende
de Angelo Porcheddu

Mudu e pessamentosu las coizas
sas dies, in sa tula chi attraessas,
e paret chi chirchende non resessas
d'agattare sa cosa chi disizas;
e ca solu sa "chirca" contivizas
mustras chi est sa mira 'e su chi pessas.

E chircas cun sa lughe 'e su sentidu
su deris chi trazadu che hat addae
su tempus, e in su passadu grae,
che dogni cosa che l'hat remunidu,
e abberrer sas giannas de s'olvidu,
s'ammentu no est sempre chi hat sa giae.

Ma tue sighis a girare in tundu
chirchende s'istajone florida
ch'in d'un'asciada 'e oju est isparida
in su pressosu rodare 'e su mundu,
e bider cheres si sulcu profundu
b'hat imprentadu s'aradu 'e sa vida

cando laurende terrinos asciuttos
has ispaltu suores e fadigas
sonniende indeoradas ispigas
de messar'in sos istios alluttos
ch'incunzas prinzas de innidos fruttos
lassadu haeren lùghidas istigas.

Debbadas chircas in sas grogas tancas
Su profumu lassadu in sos beranos,
e su tenneru risu 'e sos manzanos
restadu in sas avrèschidas biancas,
ca che sun ruttos tottu in sas calancas
de su tempus fuidu da-e manos.

Ma oe, vagabundu e chena ghia
Sighis sa "chirca" tua che poeta
In gana 'e ruper s'anima inchieta
Ch'est palpitende in s'umana zenia,
e cun sas giaes de sa fantasia
frisciare fora ogni pena segreta.

Sighi a chircare rupende su monte
de su misteri' 'e s'esistenzi 'umana
fintz'agattare s'amena funtana
ch'aundet de amore ogn'orizonte,
e-i sas dies ch'has galu 'e fronte
las infundat de paghe soberana.

Chirchende sighi fintz'a iscoberrer
dulches sentidos chi sun in costòu
in dogn'omine, e de s'intimu sou
potat semen de nobilesa offerrer
e in s'umanidade a che l'isterrer
pro chi fiorat unu mundu nou.

Terza Classifica alla Prima Sezione - Concursu de Poesia in Limba Sarda - Tissi 2008