Chervas
di Mario Nurchis

Su ‘entre de sa terra
retzit s’alvada
chi abberit
illiscighende e ortulende
sa pallidesa ‘e su fenu
mudèndela
in d-unu castanzu
uffiadu e saliosu.
Sighin gioghende e brinchende
sos fideles caos marinos
in protzessione.

No isco proitte
ma su colore de sa terra arada
no mi paret mai metzanu,
antzis est una bellesa
chi mi cummovit
‘attèndemi assèliu e consolu.
Tet èssere su sinnu chi est finida
sa siccagna malaccudìda,
e mancari an a segundare
sas làgrimas ràntzigas
de s’atunzu
e sas arpilìas
de sos abbratzos frittos
de s’ierru,
sas chervas, tottas umpare,
risulanas mi paren,
pienas de impromissas
e de isperas.

Menzione al Concorso di poesia sarda “Antoni Piludu” 2009 di Scano Montiferro