Epuru ti creia ismentigada,
bessida dae sos mios pensamentos,
ma in unu cuzoleddu ’e sos ammentos
s’idet chi ancora fis bene cuada.

Ei sa tremuladura mi l’as dada
e ischidadu m’as sos sentimentos
daghi t’ap’idu pro pagos momentos
colende in sa carrera, a s’ispessada.

A sa bula m’at bennidu unu nodu,
atàpida a su coro ap’intesu,
sa chiza chei sa tela si m’est fata,

anima e corpus m’as postu in cumbata,
de amore forte mi so torra inchesu
pérdidu in unu mare chena aprodu