Che feminas in dolu
de Vittorio Sella

Chercos in beste niedda
cumparin suta custu chelu biaitu
intorticatos a terra.
Sun bennitas a mesudie
sas framas
ingullinne agganitas
ozzas, arvores
e ispinas de gardu siccu.
E sa braja cun dentes rujas
ischintiriddanne rosicat s'iscorza,
sa purpa 'e sa linna.
Sa terra intostat niedda
s'urtima raichina 'e vita.

Sos chercos a borta 'e die
istraccos
non brujan pius
supra sas bardules budditas.
Che feminas in dolu
in s'ora iscurosa
tentan sa morte
cun ramos assatos
a cara a sos roccaglios.

E non miran s'incantu
de custu chelu biaitu
chi non cheret nughes de chisina.
S'anima pirmata intrat in pelea
prejonera de sa sorte nostra
chi casticat onzi istiu.

1° premio nel concorso di Poesia "Giorgio Pinna", sezione verso libero, Pozzomaggiore, 22 agosto,2010