Cantu podet sa paraula
di Salvatore Ladu

Deus, divinu Re, su Criadore
A s ‘universu, principiu at dadu
Faghet s’omine ‘e pruere impastadu
De sa terra lu nominat tutore.

L’at postu intelligente unu cherveddu
Ancas, brazzos e coro pro amare
Una cumpanza pro moltiplicare
Sa limba in bucca pro tenner faeddu.

Li nat de non peccare e narrer faula
De rispettare su simile sou
Cant’at in dote esseret dadu prou
Faghinde usu currettu ‘e sa paraula.

Prite lassada isorta, faghet dannu
Che lama temperada de ispada
Ma cando a su cherveddu est collegada
S’omme minoreddu faghet mannu.

Amus bidu da su nudda creare
Preigadores de fumu e de vogu
De s’onestade vaghindesi giogu
Fraigande casteddos unu mare.

Illusiones senza fundamentu
Si cun zertos sos ojos no apperis
Sas paraulas ch’as intesu deris
Bolande che chisinas a su entu.

S’in intragnas de s’omine at abittu
Su sensu de s’onore, fittianu
Las firmada cun d’una istrinta ‘e manu
Paraulas chi valene un’iscrittu.

E mandat a sa vurca avoccaeddos
Chi a doppia vazze an sa paraula
Vaghende bier beru su ch’ est faula
Nande chi volan finzas sos poleddos.

Si poi si trasformada in fiaccas
L’ischimus chi lusingat e offendet
Nat s’omine ch’in zustu si difendet
Uricra surda a paraulas maccas.

Segnalazione al Premio Logudoro 2007