Tantis hanti fattu sa cumparsa insoru
Is canticus sardus de ddus presentai
Cantau hat Campidan'e Logudoru
Cun'is bellas modas de deppi accisai
Chi fatzu sa parti mia mi ristoru
Sa poesia occulta non bollu lassai
Mi armu de coraggiu m'allirga su coru
Voluntariosu mi pongu a cantai
Senza de is atturus ca seu m'addoloru
De Delfinu Porcu e Peppinu Ghiani
A s'Isola nostra chi vantu e onoru
Fradis mius sardus pregu a m'ascurtai.
Sardigna arrica de dogna tesoru
In sa repentina dda depiu vantai.

Dda deppu vantai, da deppu vantai
Sardigna pren'e vantus, terra famosa po santus
De tenniri mari è digna pren'e vantus Sardigna
Di erois po gherra po santus famosa terra
Fruttuosa e amena Sardigna de vantus prena
Amena e fruttuosa terra po santus famosa
Ricca de dogna cosa po chi Isola piticca
de dogna cosa ricca trigu bestiami e dinai.

Minieras de contai, oru e argent'e donai
Nciàt montagnas interas de contai minieras
Tant'altru a cumprimentu donant oru e argentu
De is insoru intragnas nciat interas montagnas
De is intragnas insoru donant argentu e oru
Custu è sardu tesoru nareus cun reguardu
Cust'è tesoru sardu ddonori e nodda sfami.
Sardigna pren'e vantus...
Dinai trigu e bestiami.
Durad'eterna ddi brami po dotta genti dd'ami
Cument'antiga e moderna ddi brami durad'eterna
De cument'è connota dd'ami po genti dotta
Po artistas è famada ddi brami eterna durada
Connota è de comenti dd'ami po dotta genti
Umili a Deus credenti laboriosa cun'isbrigu
Sardigna pren'e vantus...
Dinai bestiamini e trigu.

De su mundu interu sprigu matta chi hat fatt'aprigu
A dogna regnu e imperu sprigu de su mund'interu
Persighida e post'infattu mattà chi aprigu hat fattu
De fundu si scit sa data chi hat fatt'aprigu matta
Si scì data de fundu sprigu de s'interu mundu
Chi dda vantat Raimundu dogn'orta chi cantat
Chi Raimundu dda vantat gei dd'aaaadi a meritai

Ses Isola nostra prena de onoris
Su meritu tenis de ti lavanzai
Poi su diluviu is abitadoris
Dd'us has'invitaus a nci dimorai
Siriacus Fenicius primus fundadoris
E is de Giosuè bennius po campai
Teneus de custus messaius pastoris
Sa summa de is Nuraxis po commemmorai
Jolau e Sardus tent'hanti favoris
E de Sardu su nomini non cancella mai
Gregus e Troianus puru possessoris
Cartagini e Roma po di guvernai
Suggitta a is Reis e Imperadoris
Tottus in s'idea de si profitai
Lompiu hat de Cristu tres predicadoris
Cun'in su Vangelu po s'indottrinai
Dus Sardus Pontificis tenint valoris
Obispus e Diaconus santus de amai
De dogna ratza tenit Professoris
Scrittoris de fama genti po pintai
In dogna tempus tent'hat Cantadoris
Sa Liric'a prenu po dda maniggiai
Chi Paulu Quint'u giardin'e froris
no hat nau invanu po ti titulai.

Samassi 1935

C.P

©. 2026 Raimondo Murgia - Tutti i diritti riservati