Cando Deus
de
Fernando Piras

Cando Deus benidi a mi leare,
ca so religiosu eo lu sigo;
puru rebelle no chelzo brigare,
ubbidiente a Issu m'affido.

Imparadu happo chi in cue,
de sa vida no b'had'iscadenzia,
dai su fossu però, nisciunu fue'.
Su risultadu isetto cun passenzia.

Comente finidi, chelz' ischire,
si cando arrivo, agato zente,
si riende benin' a mi rezzire,
o si invece no b'ha niente.

Ma si est bera sa religione,
inie incontro amigos e parentes,
gai distingo sas pessones,
chi mai sun bessidas dai mente.

Si tottu custu, m'est negadu,
e chi in fundu est solu terra,
puru in sa morte han' imbrogliadu;
e pius no lis potho fagher gherra.

Comente in cheja hana sempre nadu;
chi terra fui, e terra so torradu.

Ollolai 04/11/2014