Cando colcat su sole
di Augusto Piras

Su sole, a sero, sos rajos ritirat
in mesu ‘e montes o undas de mare,
da sas peleas si cheret pasare
in mantas isteddadas d’assulenu
e s’olvidare ‘e ogni male anzenu
chi l’afastizat cando a terra mirat.

E deo puru, a s’ingulta ‘e sa lughe,
istraccu ‘e tribulias fitianas,
de su reposu chilco sas funtanas
pro mi tudare dolos e anneos,
ma issos non si colcan, restan reos
chimentendemi che Cristos in rughe.

Non so su sole e gherro sos affannos
de pantamas e tristos pentzamentos
pro nd’alanzare sos pagos mamentos
de paghe ondrados e bisos serenos:
nadende liberu in campos amenos
mancari anneulados da sos annos.

Sos betzos bido de sa ‘idda mia
setzidos in carrela a su serenu,
e sas mammais non pasan s’alenu
in contos de magialzas e de janas
mentr’in chelu s’isterren sas campanas
tocchende s’ora de s’avremmaria.

O trumas de pitzinnos sena pasu
currinde de sas baddes sos caminos
o gioghende cun s’abba in sos trainos
in mes’‘e su ludu e illoroddados,
cun sos caltzones totu tapulados
a pes isculzos e pilos a rasu.

Custa iscuta ‘e recreu mi incaminat
s’anima istracca e ferta da sos annos
e pagu como contan sos malannos
ca mi l’intendo chi non b’at bessida
ma ogni note giogo sa paltida
finas chi essit su sole e m’illuinat.

___________________________________

Primo Premio al Viniscola 2012