Campanas isoltas
di Ziromine Zazzu

Tinnide subra 'e 'idda
a boghe manna,
o campanas isoltas
pro narrer a sa zente tramudada
chi su Gesus,
poveru fragelladu post'in rughe,
torr'est resucitadu
in custa Pasca.

O frade de amore e de dolore,
non cumpresu sempre dai sos pius,
e como e tando,
dà un'ojada a sa terra
a bider cantos, a bider chie
a sos dissignos tuos
cun manna umilidade est pius a curtzu...
e naranos si b'at caminu
chi giutat custa vida
a campos fioridos de laores,
a calchi die de chelu...
chentza pretesa, a isperantzias noas.

Tinnide subra 'e 'idda
a boghe manna,
o campanas isoltas,
tinnide pro tzocare,
pro abberrer tinnide
cun sa manu de Gesus
sas giannas a s'amore e a sa paghe...
E tinnende faghide
ch'in custa die santa
ruan odios e rancores cuados
dai sos coros ofesos e feridos...
Tinnide ammentende,
a boghe manna
chi su Gesus morzende at perdonadu
chie l'at post'in rughe
e cundennadu
innotzente che anzone.

Tinnide subra 'e 'idda
a boghe manna,
a boghe de festa,
o campanas isoltas,
pro narrer a sa zente 'e bona fide
chi su Gesus,
poveru fragelladu post'in rughe,
torr'est resuscitadu in custa Pasca.

Poesia inviata da Domitilla Mannu