Est mesanote in puntu.. fea est s’ora,
cando afferro su tràvigu accudidu
chi m’appètigat s’ànimu aturdidu
e sa frìchina ‘e vida ch’apo afaca,
su tichi est peleènde chin su taca
ponzèndemi su coro in dolu e iscora!

E cando intendo intrare cudda crae
in sa topa 'e sa janna illadiada,
m’essin iscràros de s’èpuc’andada
cordonada de gioia e de recreu,
chin sos carrales, mama e babbu meu,
bisiones ch’annòan pena e prae.

E in su mentres chi mi trobit manos
su “Capu” mi pregontat: prontu sese?
“E tzertu, li rispondo, e ite crèse...
sett’annos sono chi sò bell’e prontu
appilliadu a su bramadu iscontu
ch’apo solu nuscadu in sònnios vanos.

Su marissallu fritit sa ghizida
e tètteru a s’impinnu ‘e su dovere
m’atzinnat impressidu umbe mi sere
chin boghe agrita, rasposa e severa,
prassamende su ‘òlu a cudd'ispera
ch’aìa ‘intro ‘e mè, bene fichida.

E lighèndemi brùssos e carcanzos,
mi frìmmat ancas, cùccuru e petorra,
chin sa bàvula in laras che cogorra
s’ispantu annoto in cara ‘e s’assembrea,
bene assentada e cumposta in cradea
tra zùdighes e nòdidos istranzos!

E cando est totu cantu bell’apostu
e nd’est sa truma pront’ a s’ispetàculu,
in sa mudesa de su tabbernàculu
s’intendet , “naran”… s’urtimu afannosu
respiru, surdu, tostu e orrorosu…
chi a sa vida mea... narat: Bostu!

Secondo premio al 32° Concorso poesia in lingua sarda Sant’Antoni de su O’u Mamoiada 2023