Bos hapo dadu
de Giovanni Soro

A manu tenta
bos hapo leadu
e hazis caminadu
contentos
in s'avreschida
de sa vida.

Su coro
bos hapo intregadu
e-i sa lughe
de sa die bella...
e hazis carignadu
cun ojos feliztes
sas isperas
e-i sas prommissas.

Bos hapo dadu,
fizos,
sos dolores de sos manzanos
de gherra,
s'allegria de sos seros
de paghe.

Hazis imparadu:
sa vida est ispera
chi non morit,
es' prommissa
chi non finit,
es'gherra
chi faghet omines,
est allegria
de riu mannu
chi canta pasadu
sa felitzidade
de un'iscuta