In segretu a sa muda, sos sentidos,
de s’intimu iscurrizan in s’umbraghe:
tzertos bestidos de amor’ e paghe,
àteros d’ odiu e rancore ‘estidos;
tottu da un’intragna parturidos
m’ allattados in diversu tenaghe;

e sende a contra, in su giogu revudan
fintzamenta sa lughe ‘e sa rejone,
che fizastros ch’ an sa domo a cumone
m’ a gustu, tottu, azzenden e istudan,
e a s’ ispissa brigan e s’ imbudan…
ca sun de diferente opinione.

S òminemedas boltas est custrintu,
unu zuìghe impotente a esser:
cun su filu ‘e sa rejone, e non resesser
a nd’ esside da-e su labirintu
de sentidos in briga cun s’ istintu
chi non lassas sa giusta trama tesser;

e l’ est su coro ‘emilli dudas fertu
cando a sa mente benin in abboju
pro fagher, bene omale un’ isforroju
in s’ anima ch’ intrados sun in chertu,
ponzende s’ intellettu in iscussertu
chena poder isolver su troboju.

In cantidade e forta s’ aggualan
“bonos emalos in s’ arcu ‘e sa vida,
gioghende in sinu s’ arcana partida
daghi a su campu ‘e s’ ispiritu falan,
e “dulche o agru” a s’ anima regalan
a segundu de chie ‘inchet s’ isfida.

Fortza misteriosa soberana
sun sos sentidos de sa nostra rèntzia
chi Natura, de “rejone e cuscientzia”,
at istrinadu sa zenia umana,
ma issos, cun su poderìu ch’ ana,
faghen su giogu cun… indipendentzia.

E in sumundu ‘e oe, a ferru e fogu,
cun rantzigos sentidos de rancore,
sun isparghende giogos de dolore,
de samben, luttu emorte in dogni logu,
bocchende fintzas s’ ispera ‘e “su giogu
de sos sentidos” de pagh’ e amore!

Mentzione - Tema: Su giogu de sos sentidos - Premiu Logudoro. Otieri 2008