Poesia in lingua sarda · Orotelli, 17-12- 2010
Bonas Festas
Pro Luisi Ladu e Familia
Bonu Nadale e felice annu nou
di auguro ch’in tottu su coro
e a Deus preco e imploro
chi di diada salude a gustu tuo
e nascata in sa gente bonu prou
pache armonia e decoro;
e firmete sa politica sfrutta dora
e sos mafiosos andene in malora.
Torrete s’antica compressione
de amare su prossimu che frade,
torrete su rispettu, sa serenidade,
sa cuncordia in cada nazione.
Fia biu in dongi persone
su triballu vecundu e libertade,
torrete su benessere in tottue
chi sias che a mie, e geo che tue.
Custa e sa vera opinione
de su zudissiu meu veramente
de amare, e dare a sa gente
rispettu, e nutrire ogni persone.
Dare triballu, pache e unione
chi si vivata sa vida onestamente.
Medas riccos a canes e battos
li sfachene sa tumba e retrattos.
Custa e s’ingordigia de varabuttos
chi amana su inare pratta e oro,
no ana affettu pro su frade insoro
animales crudeles assolutos.
Sunu de coro, e animos bruttos
indolentes, viles senza decoro,
nefastu e s’issoro ideale
chi babbu e mama trattana male.
Sos predilettos fizos d’Elicona
chi ana sensu, decoro e zudiziu
s’annu nou siata s’indiziu
de salude, benessere e cosa ‘ona.
Sos camorristas ruana in prezudiziu
e perdana podere, sediu e poltrona.
A tie LUISI dae coro mannu
a gustu tuo d’auguro “BON’ANNU”.
Bonas festas a tott’umpare
cun sa familia unida,
di surrida de benes sa vida
cantu cheres cun modu esemplare,
e bidas a fiza tua sanare
e allegra che campagna fiorida
di accatte de improntu sanada
dae s’Ente supremu miracolada.