Bisos Beraniles
di Vittorio Falchi
a Maria Teresa Palitta, sonniadora

Sa luna giogat a tene tene
cun sas nues in passera,
su ‘entu cun su fuette
colpat che maccu e las isperdet
in sas aeras
che masones d’erveghes
baddinosas.
Maria profumada de gravellos
murmurat in su balcone
una cantone a sa luna
chi curret, giogat, riet
e no pensat a Maria.
O luna, luna de pedra
e de rena indeorada
manda sonnios a Maria
cun sos cavanos de rosa
cari trista, imprateada
tra sos vasos de gravellos.
In sos oros de caminu
de sa chigula sa ciarra
est musica chi piaghet
a sos bisos de Maria.
Curre pizzinnedda bella
afferra, afferra sa luna
chi ti fuet in sos montes
profumados de mudeju.
Maria in sos gravellos
bisat cun ojos maduros
sa luna chi curret, curret...
sa luna chi giogat, giogat...
giogat a tene tene
cun sas nues passizeras
e tendet sas manitteddas
pro la cherrer afferrare,
ma issa si fuet, fuet
fuet in chelos de prata
e Maria restat sola
cun sas manitteddas tesas
profumada de gravellos.

25 de santaine 1979