Birde sa tanca mia
di Giovanni Fiori

Birde sa tanca mia! ‘Irde sa tanca
1 ìnnida e manna e pàsida in sos littos.
Brincan tottue attattos mannalittos. 2
Un’iscaccàgliu 3 ‘e pappàiles rujos...
Curride! Oddeu! Allummados restujos
in-d un’isprammu 4 ‘e chijìna bianca.

Birde su coro ‘e sas chimas attesu
ue s’élighe trìnnigat 5 e riet.
E chena pasu in sas olias friet
sa chìgula 6 arrughida 7 a sole altu...
Nudas rughes nieddas in su saltu
mudu pedrale in-d un’inferru atzesu.

Birdes sas undas largas in s’istiu
lìmpias e chietas ninna-ninna.
A chenadorzu 8 sa chedda 9 pitzinna
atzendet s’ ‘adde de ‘oghes e sonos...
Disisperados mùilos 10 che tronos
falan subra sa braja fintz’a riu.

Ma como iscùltami! Istranzos de fora
e isterzeris 11 pàschidos inoghe
suore e samben e ispera e boghe
pro ti render isciau 12 ti ch’han suttu.
E han sas linnas che faddija 13 alluttu
pro tempos e tempòrios... E ancora.

Iscùltami ‘e nou. E non ses tue
Probàina 14 ‘e custa terra beneitta,
tue ch’has bidu sa carena fritta
e frade tou in sa chijina calda
fizu de cust’antiga terra salda
ch’indonu 15 pedit lùttios 15 a sa nue?!

E duncas beni. In punta ‘e sa calanca 17
su chercu isparghet bélidos de fogu.
Pèsadi che ispada in dogni logu
e ondra 18 sias e fidele amparu. 19
Millu torra su sole addae giaru!
Birde sa tanca mia! ’Irde sa tanca.

____________________________

1 ìnnidu - integro, intatto.
2 mannalittu/os - animale (agnello, mucca, capra) allevato in casa con molta amorevolezza.
3 iscaccàgliu - scroscio, effetto sonoro fragoroso.
4 isprammu - spavento molto forte.
5 trìnnigat, trinnigare - scuotere leggermente.
6 chìgula - cicala.
7 arrughida - rauca, roca.
8 a chenadorzu - l’ora in cui, in particolare d’estate, il gregge, verso il tramonto, viene portato al pascolo.
9 chedda - qui, piccolo gruppo di animali.
10 mùilu/os - mugghio, grido.
11 isterzeri/s - espressione sprezzante verso chi si asservisce a poteri e interessi estranei alla propria terra.
12 isciau - schiavo.
13 faddija - qui, focolare, “cenere accesa e viva”.
14 probàina - propaggine.
15 indonu - invano.
16 lùttiu/os - goccia, stilla.
17 calanca - dirupo, voragine.
18 ondra - qui, difesa, tutela.
19 amparu - riparo, sostegno, protezione.

Premio Speciale della Giuria al Logudoro di Ozieri, 1990