Binnenna
di Mario Nurchis

Sa ‘inza est ruinzada in cussa pala
in custu atunzu caldu e iscontriadu
e su sole s’isparghet a un’ala
comente amore perdidu e agatadu.

Su tempus de sa ‘innenna est già finidu
ma cantos e cantones de su risu
che-i-sa nues m’an finas pissighidu
naschende in coro comente bellu bisu.

E fatuvatu mi sighin sos lampos
de ogios nieddos chi lughen in su sole
e coros a tocheddos in sos campos
faghen intender disizos de amore.

E dillu giamat dillu ‘e bonu gustu
cun berritas e muncaloros grogos,
cun manu russa o diliga de mustu
e caras ammainadas a sos giogos.

E foscigas si ponen a cantare
forrojende in sas fozas de muscadu,
seghende ‘udrones pro los catigare
a nd’essire licore insambenadu.

Ma un isparu ‘e fusile mi nd’ischidat
e reu m’agato afac’a unu pirastru.
Gai su tempus de gosu si l’aviat
e si nde fuit comente un abilastru,

lassendemi in mesu ‘e sas ringheras
cun iscaluzas tundas ebbìa
ca passados sun tempos e maneras
de ‘innennare a cando si deviat.

Ma cun ispantu bido chi sun bonos
sos pupujones rujos e indorados
puru si no intendo pius sos sonos
de sa festa de fundos binnennados.

E penso a sa ‘inza de sa vida
cuberrada dae su Padronu Veru
chi pagat sa manialìa acoglida
cant’e pare, cun faeddu sintzeru,

ca su chi cheret Santa Padronìa
est su coro de bona voluntade,
est sa risposta a sa giamada mia
puru si fit a tardu a tribagliare.