Mi lu naran sas méndulas biancas
ch’est già ‘eranu e tottu si colorit,
su sole ispaltu cumprit e fiorit
sas gemmas de sos fruttos. In sas tancas

sos fiores campinos an bestidu
sa terra nuda de milli colores,
sos puzones cantende sos amores
a fenu in bucca s’intessen su nidu.

Pàsidas abbas curren in sos rios
e cantat su pastore pili-canu
una cantone mia a boghe intrea.

Eh !! Si potteran custos annos mios
fiorire che frunzas in beranu,
no aia connottu sa pelea

de sa ‘etzesa chi m’istringo in manu
setzidu in coa ‘e s’istajone fea!

Mentzione de Onore – Setzione A – Poesia in rima Prémiu de poesia in limba sarda “A pes de Santu Padre” – VI Editzione Bortigale 16 de Sant’Andria 2019