Babbu e-i sas bides
de Giovanni Fiori

trisenàrios; o noenàrios addoppiados

Anzones sididos. Cunsonos pedrales. Dultzuras de fada.
Si ballan sos ratos pesudos; e deo no isco si tue
m’iscultas. E mentras s’isterret s’umbragh’ ‘e sa die tudada
mi frimmo. Su ‘olu ‘e sa rùndina abberu trattenet sa nue.

S’ischìglia 1 ‘e su pensu non càgliat ne ruet su càntigu in tulas 2
lassadas a siccu. E ammento... Sas naes de s’ànima ‘e nou
m’apporrin rebuddos brottende. Abbóghinan como sas bulas
e allenan sos nodos astrintos in sinu ‘e s’isméntigu tou.

Marranu 3 si fuis! Marranu si torra in sa bérgula ruja
frastimas sa mérula in cria… Peràulas de néula non cherzo
ne cherzas cantones fumosas. Sa luna sestada a sesuja
paschende in sos montes t’ammustro: e gai cantende t’abberzo

su mundu, e inserro in pianta ‘e manos sas oras chi bramas.
Ma dolu e suore e peleas indonu non timas. Si cheres
luego t’isolvo vampadas 4 in chelu: e addaghi mi giamas
seguru hap’a benner che deris, a tales chi sàbiu ti seres

it’est trigu nettu, it’est lozu 5... Diadas, ah cantu currides!
S’ ‘Udrone istanotte non paret manch’issu; in sos littos si ch’ ‘ettat
a bellu cun ala abaccada 6… Che pìscamu, babbu sas bides
hat postu 7 in su pàstinu 8 nou… E torra ‘innennas 9 isettat…

__________________________________

1 ischìglia - squilla, campanella.
2 tula - porzione di terreno già predisposto per la semina.
3 marranu… guai a te!
4 vampadas - fiammate.
5 lozu - loglio.
6 abaccada - tranquilla, quieta.
7 postu - pònnere, qui vale piantare.
8 pàstinu - nuovo vigneto.
9 ‘innenas (binnennas) - vendemmie.