A Z

Cand’ est ch’ a su destinu nant ispantu
In mes’ ‘e sas ispinas naschint frores,
Et cussas oras tristas de piantu

Si tinghene de luchidos colores
Fachendem’ olvidare custas penas.
S’intendent, cando mudant sos sapores,

Sas lacrimas chi falant lenas lenas
Et durches custos cavanos carignant
Rendende sas vijones tant’ amenas.

Sunt medas sas bellesas chi mi signant
Sa mente, s’inzenuidad’ insoro...
Ma pacas sunu cussas chi m’impignant

De ponner’ una prend’ intro su coro
Pro l’adorar’ onzi die ch’ arveschet
Et pro la costodire che tesoro.

Cand’ est chi un’amore si nd’arreschet
In janna fartza, no este sintzeru;
Ïder su sentimentu chi s’aveschet

Mi privat de sa luche, ca severu
Si mustrat su destinu pro sa bida.
S’est cussu sentimentu pacu veru,

M’aperit et mi cariat s’erida:
In d’un’abissu tudu m’ ïdo rutu;
Ma cando, luminosa et dechida,

M’ischidas tue dae tantu lutu
Ch’ eternu minethavat temporada,
Mi torrata su cavanu asciutu,

Et s’ ïder de sa tenera mirada
Su palpitu mi faghet alligrare.
De mele si presentat s’agherada

Chi Venere podet imbidiare:
Furadu l’has su tocu d’hermosura...
Et Deus chi si podete äntare

De t’haer fatu bella, creatura,
Naschid’ in sas deliscias de su mundu...
Non b’hat femìna digna de natura

De ponner paragon’ unu sicundu
Chin tant’ ispantu, cussu chi ses tue.
In coro unu surcu ch’ est profundu

Dassadu m’has colande fue-fue
In sas malesas de s’anima mea.
Ti chirco, non t’ acato, ses inue?

Si cheres, custu coro ti nde lea:
A tie impignadu l’hap’ in donu,
Ca de t’amar’ eternu hap’ idea

Et de ti collocar’ in d’ unu tronu.
Sa mea ses sa musa, ses s’eleta,
Sa ninfa chin su coro su tantu vonu,

Ca de sas creaturas ses dileta,
Ca de sas printzipessas ses signora,
Su äntu de cust’ anim’ imperfeta

Et de sa bida mea s’aurora.
Su vene meu totu tand’ atzeta,
Ca su sorrisu tou sogn’ ancora...

Antonio Brundu