Atturradu
da sas turres d’Ottana
so torradu
a s’umbra sacra
‘e s’anticu nurache:
E in cust’or’istasìda
de agustu
mi si perden’ sos sentidos
in d’una bision’ ‘e disattinu.

E dzeo m’intenno
puzzone irmarinadu
prenu de angustia e de ispòru,
ca finzas sa cussorja
ube apo prantadu
sas urminas pizzinnas
a’pèrdidu pro mene
sas làccanas connottas.

Mi mira’ piedosu
s’isteddu chenadorju,
ma no’accatto prus
sos istentales
chi m’in cumpanzos
in sa nott’isteddada
chin sa gama ziranne in sa leada.

E si m’agurtin puru
sas paragulas notas
c’aian una die
su brùnzinu sapore
de sa limba nadia.

O.G.M.
so attu jeo puru
chei su tricu
chi prus non messa’
su massaju,
chei s’erbeche
chi prus non murghe’
su pastore.

Eppuru
galu mi reghe’ s’ispera
de torrar’a buffare
carchi die
chin sa bajon’ ‘e brustica
s’abba sacrada
de <su tempiesu>.

N.b:
O.G.M: organismo geneticamente modificato.
Su Tempiesu: Fonte sacra nuragica.

1°premio poesia sarda in logudorese e in gallurese - Premio letterario città di Olbia V° edizione 2018