Atitos
de Anna Maria Sechi

Ite cheres chi ti cante
De sos annos de sa vida
Pro a tie coro meu,
Si oe non so mancunu
Nen pro me nen pro niunu?

In sa malaita sorte, ando
Nche àrbure in terra ruta,
so sola, in sa turmenta
Chirchende so agiudu
Chi non tenet nisciunu!

Sas trampas e tranbucos,
Mi ferint e m’istropiant
Ca sa marea umana
Est fat’a lazu e ludu
Chi non connoschet niunu!

Chirchende cun angustia
Ojos chi mi potant dare
Un’ispera noa de vida,
Un’amigu… solu Unu!
Non si nde bidet mancunu!

In sos mamentos de pena
Sa mente est for’e via
Su coro presu a nodu,
M’abbizo totu in unu
Chi non bivo pro niunu!