Astula‘e ocu
de Tonino Fancello

Ses che astula‘e ocu in custu sinu
in cust’anima bene amadricada
che una rosa c’aperit sa zirada
e mudat custu coro che zardinu.

Ses un’astru c’acchirrat porporinu
e ti lassat intessia sa colada
che una luna luchente appaneddada
e sa lantia nd’ispianat su camminu.

Chilliamillos in coro sos mementos
iscrittos son’a bisos d’armonia
a caddu de sos lampos e sos bentos.

E lassan in sa terra sos sementos
e in francas e in chimas de ulia
arrumban ben’istrintos sos ammentos.

Mensione speciale a Ittiri anno 2011