Aperta in campu
di Franceschino Satta

Cherjo pinna e tinteri e un fozu
pro iscriver sas penas
chi mi tormentan s'anima.

A pizzinnu, m'ammento,
cando pessabo, alligru, a su "futuru",
su coro iscussertau
caminzabat a currer
che calabrina rude
e bolabat in prados de recreu.

Sas chimeras
mi fin amicas caras e chin issas
m'appilicabo in artu, in sas istellas,
ube sònnios d'amore
m'accasazaban s'anima innossente.
E fippo
s'essere prus felize 'e s'universu.

Sa luna
fit s'aschisorju arcanu
ube sos frores durches de s'Eternu
frorìan,
tra delissias e litos de cossolu,
pessos de bonidade e rios d'oro.

Commo so' bezzu, hapo
prus de milli beranos e mi paret
chi custa bida siat
sol'un ingannu arcanu
ube su sole ingoghit
sos frores prima ch'hapan
accasazos de frinas
e sinfònicos cànticos d'amore.

No isco ite pessare: so' che nemmos
in d'unu mare 'e penas
chertorande cantones chene sensu.
Deus
non m'hat apertu in campu
sa janna durche e bella
de sa siènzia umana, e nde so' tristu.

Ma non m'iscred:
so' inoche, isettande.