Ap’iscritu una lìtera a Gesusu
di Antonio Piras

Poesia de Nadale po sos pitzinnos de iscola

Ap’iscritu una lìtera a Gesusu
como chi su Nadale nd’est afaca,
però la tenzo ancor’in bussaca:
sa pius sigura no’ l’ispedo prusu!

Narat: “Mi diat fagher piaghere
de mi mandare unu regalu bellu,
su cellulare, s’ultimu modellu.
Cantu l’iseto, tue no’ b’as a crere!

Chi fetat finas sas fotografias
e chi dognunu nde contet ispantos,
fetad’ingelosire a totucantos
cuddos cumpanzos e cumpanzas mias.

Po imbiare a totus messagginos
e navigare finas in sa rete
cun su collegamentu a Internete
chi mos faghet intender prus vicinos”.

……………..

E l’ap’iscrita da chidas e chidas,
ma como penso chi so’ in errore
ca so’ ancora pitzinnu minore.
Custu fogliu lu fato a frichinidas!

In regalu ti pedo chi sa fiama
de s’amore siet semper atzesa,
mannu divente cun sa cuntentesa
e s’afetu e’ unu babbu e de una mama!

Iscanu, Nadale 2005
(Maestro Ninni)