A sighire sas Sagradas Iscriduras
in s’andala
chi jughiat a Damasco
bi falaiant lampizos de vida
e sos tzegos a sa congruida
perdidu s’ogru…achistaiant sa vista.

Como bi falant lampos de disaura
litanias de aschiu a s’isfunada
cun sa mitralla
pronta a traghidare
chirchende puntamentos de morte
e carres bias de poder marturare.

In cussa terra
de passos lantados
a sole artu bi paschet sa note
e umbras de frores si sunt allizados
in d-unu irvariu atzesu che fogu
chi lassat a fine
su desertu in s’anima

E su mundu surdu chi no bidet
ne intendet
su lamentu chi nd’essit
dae sa crosta issambenada
de sas peraulas finidas.

Muda est sa paghe
e morta sa rejone
chena mancu
dies pitzinnas de allevare
e fuet sa zente a sa disisperada
ca in s’andala
chi jughet a Damasco
paret finas s’isperantzia abbruvurada.